သံလွင်ခက်
ဇန်နဝါရီ ၁၃ ၊ ၂၀၂၄။
မြန်မာစစ်တပ်အာဏာသိမ်းပြီးနောက်ပိုင်း ပြီးခဲ့သော အောက်တိုဘာ ၂၇ ရက်က စတင်ဆင်နွှဲလာခဲ့သည့် မြောက်ပိုင်းညီနောင်မဟာမိတ် ၃ ဖွဲ့၏စစ်ဆင်ရေးများသည် စစ်ကောင်စီအတွက် အကြီးမားဆုံးသော ခြိမ်းခြောက်မှုဖြစ်လာခဲ့သည့်အတွက် အပစ်အခတ်ရပ်စဲရေးကို မဟာမိတ်အဖွဲ့များနှင့် စစ်ကောင်စီက သဘောတူညီခဲ့ရသည်။
တရုတ်နိုင်ငံအနေဖြင့်လည်း နှစ်ဖက်တပ်များ အပစ်အခတ်ရပ်စဲရေးကို ကြားဝင်ညှိနှိုင်းဆောင်ရွက်ပေးခဲ့ရကြောင်း ထုတ်ဖော်ပြောဆိုလာခဲ့သည်။
“မြန်မာနိုင်ငံက သက်ဆိုင်ရာတာဝန်ရှိသူတွေအနေနဲ့ သဘောတူညီချက်တွေကို အသိစိတ်ရှိရှိနဲ့ အကောင်အထည် ဖော်သွားကြဖို့၊ နှစ်ဖက်အပြန်အလှန် ထိန်းထိန်းသိမ်းသိမ်းဆောင်ရွက်ကြဖို့၊ ဖြစ်ပေါ်နေတဲ့ပြဿနာတွေကို ဆွေးနွေးညှိနှိုင်းမှုတွေနဲ့ ဖြေရှင်းသွားကြမယ်လို့ တရုတ်နိုင်ငံကမျှော်လင့်ပါတယ်” ဟု တရုတ်နိုင်ငံခြားရေးဝန်ကြီး ဌာန ပြောရေးဆိုခွင့်ရှိသူ မော်နင်း (Mao Ning) က ယမန်နေ့ ဇန်နဝါရီ ၁၂ ရက်တွင် ပြောကြားခဲ့သည်။
မြန်မာနယ်စပ်မှ မိုင် ၂၅၀ နီးပါးအကွာတွင်ရှိသော တရုတ်နိုင်ငံ၊ ကူမင်းမြို့တွင် ပြီးခဲ့သည့် ဗုဒ္ဓဟူး၊ ကြာသပတေး နေ့များတွင် တွေ့ဆုံဆွေးနွေးခဲ့ကြပြီး တရုတ်နယ်စပ်၌နေထိုင်သူများအပေါ် တစုံတရာမထိခိုက်စေဖို့ကတိပြုထား သည်ဟုလည်း ၎င်းက ဖြည့်စွက်ပြောကြားခဲ့သည်။
“ယာယီအပစ်အခတ်ရပ်စဲရေး”ကို သဘောတူထားကြောင်း မြန်မာစစ်တပ်ကလည်း အတည်ပြုထားပြီး တအာင်း အမျိုးသားလွတ်မြောက်ရေးတပ်မတော် – TNLA က ခေါင်းဆောင် ၁ ဦးကလည်း အပစ်အခတ်ရပ်စဲရေး သဘော တူညီမှုရရှိပြီးဖြစ်ကြောင်းနှင့် ဆွေးနွေးပွဲတွင် တရုတ်နိုင်ငံက သံတမန် ၁ ဦးပါဝင်သည်ဟုလည်း ပြောဆိုထားသည်။
ပြီးခဲ့သောဒီဇင်ဘာလတွင် အပစ်အခတ်ရပ်စဲရေးကို တရုတ်နိုင်ငံဘက်ကကြေညာခဲ့သော်လည်း တရုတ်နိုင်ငံနှင့် နယ်နိမိတ်ချင်းထိစပ်နေသည့် ပြည်နယ်များနှင့် ရခိုင်ပြည်နယ်တွင် တိုက်ပွဲများဆက်လက်ဖြစ်ပွားနေခဲ့သည်။
တရုတ်အစိုးရအနေဖြင့် ကုန်သွယ်ရေးအဟန့်အတားများနှင့် ဒုက္ခသည်များဝင်ရောက်လာမည့်အပေါ် စိုးရိမ်ပူပန်မှု များရှိနေပြီး တရုတ်သံတမန် ထန်ရှီရှန်း ( Deng Xi Jin ) ၏ ပံ့ပိုးကူညီမှုဖြင့် မဟာမိတ်အဖွဲ့က “စစ်ဆင်ရေးများ ဆက်လက်မဖော်ဆောင်ဘဲ အပစ်အခတ်ရပ်စဲရန် သဘောတူညီခဲ့သည်”ဟု ဆွေးနွေးပွဲ၏ထိလွယ်ရှလွယ် အခြေ အနေများကြောင့် အမည်မဖော်လိုသူ TNLA ခေါင်းဆောင် ၁ ဦးက ရိုက်တာသတင်းဌာနသို့ပြောကြားခဲ့သည်။
“မဟာမိတ်တပ်တွေဘက်ကနေ သဘောတူညီချက်က ရန်သူ့စစ်စခန်းတွေ မြို့တွေကို ထိုးစစ်ဆင်တာက ရှောင်ကြဥ်ဖို့ဖြစ်ပြီး မြန်မာစစ်တပ်ဘက်ကသဘောတူညီချက်က လေကြောင်းတိုက်ခိုက်မှု၊ ဗုံးကြဲတိုက်ခိုက်မှု သို့မဟုတ် လက်နက်ကြီးတွေနဲ့ ပစ်ခတ်တိုက်ခိုက်တာမျိုးမလုပ်ဖို့ပေါ့” ဟုပြောသည်။
နှစ်ဖက်တိုက်ပွဲများကြောင့် လူထောင်ပေါင်းများစွာ အိုးအိမ်စွန့်ခွာထွက်ပြေးခဲ့ကြရပြီး အချို့မှာ တရုတ်နိုင်ငံကို နယ်စပ်ဖြတ်ကျော်ထွက်ပြေးလာကြမည်ကိုစိုးရိမ်သည်ဟု ကုလသမဂ္ဂက ပြောကြားခဲ့သည်။
Ref : Aljazeera
ဓာတ်ပုံ – Reuters
ပုံစာ – တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်း (Mao Ning) ကနှစ်ဖက်တပ်များအပစ်ရပ်စဲကြောင်း ကြေညာနေစဥ်။
*********
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2992
YouTube- > https://youtu.be/SpxIBpTYop8
Website _> https://thanlwinkhet.net/?p=6996
