စစ်ကောင်စီတပ်ထိုးစစ်များကြောင့် တိုက်ပွဲများပြင်းထန်နေသည့် ဒီးမော့ဆိုမြို့နယ်တွင် မိုးများဆက်တိုက်ရွာသွန်းနေသည့်အတွက် ကရင်နီကာကွယ်ရေးရဲဘော်တချို့ နေမကောင်းဖျားနာမှုများဖြစ်ပွားနေသည်ဟု သိရသည်။
ဒီးမော့ဆိုတွင်တိုက်ပွဲများဆက်တိုက်ဖြစ်ပွားနေသည့်မှာဆယ်ရက်ခန့်ရှိနေပြီး ရဲဘော်များမှာ မိုးရေထဲ၌ပင်တိုက်ပွဲဝင်နေကြရသည်ဟု ဒီးမော့ဆိုမြို့နယ်ပြည်သူ့ကာကွယ်ရေးတပ် တပ်ရင်းA တွဲဖက်ရုံးတာဝန်ခံ အယ်မီးလျာနန်းက ပြောသည်။
” တိုက်ပွဲကဆယ်ရက်လောက်ရှိနေပြီပေါ့နော် မိုးလည်းနေ့တိုင်းရွာတယ် ။ နေလည်မပူဘူး ။ ရဲဘော်တွေရဲ ယူနီဖောင်းဆိုမခြောက်နိုင်ဘူး ။ မိုးရွာထဲမှာပဲတိုက်နေရတယ် ။ မိုးရွာထဲမှာပဲ နေနေရတယ်။ တချို့နေမကောင်းတဲ့ရဲဘော်တွေလည်းရှိတယ်ပေါ့နော် “ ဟု ၎င်းကပြောသည် ။
တိုက်ပွဲများပြင်းထန်နေသည့်အတွက် ခဲယမ်းများမှာ အဓိက လိုအပ်ချက်ဖြစ်နေသော်လည်း ရှေ့တန်းမှရဲဘော်များကို ထမင်းပို့ရာတွင် အသားဟင်းများ ထည့်ပေးချင်သဖြင့် ပြည်သူများ အသားဟင်းတစ်နပ်စာဖြစ်ဖြစ်ပါဝင် ကူညီပေးကြရန်လည်း အယ်မီးလျာနန်းက မေတ္တာရပ်ခံသည် ။
ထို့ပြင်ရဲဘော်များအတွက် မိုးကာအင်္ကျီကောင်းကောင်းနှင့် ဘွတ်ဖိနပ်ကောင်းကောင်းများလည်း ထောက်ပေးနိုင်လျှင်လည်းလိုချင်ဟု ၎င်းကပြောသည် ။
ကရင်နီပြည်တွင် ပြီးခဲ့သည့်ဇွန်လနောက်ဆုံးအပတ်တွင်းမှစ၍ စစ်ကောင်စီက မြေပြင် ၊ ဝေဟင်တို့မှ အပြင်းအထန်ထိုးစစ်ဆင်နေသောကြောင့် ထိတွေ့တိုက်ပွဲများ ယခုလထဲအထိ နေ့စဥ်ဖြစ်ပွားနေသည်။
ပြင်းထန်တိုက်ပွဲတစ်ခုလျှင် ကျပ်သိန်းရာဂဏန်းမှထောင်ဂဏန်းအထိ ခဲယမ်းအတွက်ကုန်ကျစရိတ်များရှိနေပြီး ခဲယမ်းလိုအပ်ချက်များကို ပြည်သူများ ဝိုင်းဝန်းကူညီပေးကြရန် ကရင်နီတော်လှန်ရေးတပ်များက အကူအညီတောင်းခံထားကြသည်။
သို့သော်လည်း ပြည်သူများ၏ ပါဝင်ကူညီပေးမှုများမှာအားနည်းနေသည်ဟု ကရင်နီဝံပလွေစစ်ကြောင်းနှင့် ကရင်နီ(ကယား)တော်လှန်ရေးတပ်ပေါင်းစု KRU တာဝန်ရှိသူများက ပြောသည်။
ကရင်နီဝံပလွေစစ်ကြောင်းသည် ရန်ပုံငွေအတွက် ကျပ်သိန်း ၁၂၀၀ တန်းဖိုးရှိ ကံစမ်းလက်မှတ်များကို တစ်စောင်လျှင် ကျပ် ၁၅၀၀၀ နှုန်းဖြင့် ပြီးခဲ့သောဇွန်လ နောက်ဆုံးပတ်ကတည်းက ရောင်းချနေခဲ့ရာ ယခုလ ၁၁ ရက်အထိ အစောင်ရေ ၃၀၀၀ ကျော်သာ ရောင်းချရသေးသည်ဟု သိရသည်။
ထို့ပြင် ကရင်နီ(ကယား)တော်လှန်ရေးအင်အားစု KRUသည်လည်း အရံအင်အားဖြည့်တင်းနိုင်ရန် ကျည်အတောင့် ၁၀၀၀၀ အတွက် ကျပ်သိန်း ၅၀၀ တန်းဖိုးရှိ ကမ်ပိန်းတစ်ခုကို ပြီးခဲ့သည့်ဇူလိုင် တတိအပတ်ကတည်းက စတင်ထားခဲ့ရာ ယနေ့ သြဂုတ် ၁၂ ရက်ထိ ကျပ်သိန်း ၁၀၀ ပင်မပြည့်သေးပေ ။
” တိုက်ပွဲထိန်းနိုင်ဖို့၊ ကိုယ့်အသက်ကိုထိန်းနိုင်ဖို့ဆိုရင် ကျည်ဆံအပေါ်မှာမူတည်တာပေါ့နော် ။ ကျည်ဆံရှိမှပဲ ကျွန်တော်တို့တိုက်ပွဲကို ထိန်းလို့ရမယ် ။ အဓိက လိုအပ်တာက ကျည်ဆံဆိုပေမယ့် ရဲဘော်တွေအတွက် လိုအပ်ချက်တွေက အများကြီးပဲ ။ ဒီဘက်မှာ မိုးကဆက်တိုက်ရွာနေတော့ ရဲဘော်တွေအတွက် မိုးကာကောင်းကောင်း ၊ ဘွတ်ဖိနပ်ကောင်းတွေလည်း လိုအပ်နေတယ် ” ဟု ကရင်နီဝံပလွေ စစ်ကြောင်းမှူးကပြောသည်။
ပြီးခဲ့သည့် ဇွန်လအတွင်း၌ ထိုင်း-ကရင်နီနယ်စပ် မယ်စဲ့မြို့နယ်ရှိ တပ်စခန်းများဆုံးရှုံးလိုက်ရပြီးနောက် စစ်ကောင်စီက ကရင်နီပြည်နယ်အတွင်းကို နေရာအနှံ့မှ အပြင်းအထန်ထိုးစစ်ဆင်နေပြီး ကရင်နီပြည်၏စစ်ရေးသည် လက်ရှိနွေဦးတော်လှန်ရေး၏ အဖြေကိုပေးနိုင်သည့်ဘအခြေအနေရှိသောကြောင့် ပြည်သူများဝိုင်းဝန်းကူညီပေးကြရန် KRU တာဝန်ရှိသူ ကိုလင်းလင်းကပြောသည် ။
စစ်ကောင်စီတပ်၏ ထိုးစစ်များကြောင့် ပြီးခဲ့သည့် ဇွန်လနှင့် ဇူလိုင်လအတွင်း၌ မယ့်စဲ၊ ဖားဆောင်း၊ ဘောလခဲ၊ လွိုင်ကော်၊ ဒီးမော့ဆို ၊ ရှားတော့၊ မိုးဗြဲ၊ ဖယ်ခုံ နှင့် ကရင်နီ-ကရင်နယ်စပ် ယာဒိုတို့တွင် တိုက်ပွဲများဆက်တိုက်ဖြစ်ပွားခဲ့သည်။
အဆိုပါတိုက်များအတွင်း၌ စစ်ကောင်စီဘက်က ၁၃၄ ဦးသေဆုံးပြီး သုံးဦးကိုအရှင်ဖမ်းမိခဲ့သည့်အပြင် တပ်စခန်းများနှင့်လက်နက်၊ ခဲယမ်းအမြောက်အများကိုလည်း သိမ်းဆည်းရမိခဲ့သည်ဟု ကရင်နီအမျိုးသားများ ကာကွယ်ရေးတပ် KNDF က ထုတ်ပြန်ထားသည်။
******************************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram -> https://t.me/newstlk/1768
YouTube -> https://youtu.be/Pbe2cix7VKg
Website -> https://thanlwinkhet.com/?p=5232
Website -> https://eng.thanlwinkhet.net
