Saw Smith
မတ် ၃၁ ၊ ၂၀၂၃ ။
လေယာဥ်ပစ်ပရောဂျက်မှ ရရှိသောအလှူငွေများကို တန်ပြန်လေကြောင်းတိုက်ခိုက်ရေးထက် လေကြောင်းရန်ကာကွယ်ရေးကဏ္ဍအတွက် ပို၍လျာထားအသုံးပြုနေသည်ဟု NUG၏ ထုတ်ပြန်ချက်အရသိရသည်။
လေယာဥ်ပစ် Project DragonFly ရရှိသောအလှူငွေ အမေရိကန်ဒေါ်လာ၂.၂သန်းနှင့် ပတ်သက်သောနောက်ဆက်တွဲအခြေအနေများကို NUG ကာကွယ်ရေးဝန်ကြီးဌာနက ယနေ့တွင် အသိပေးထုတ်ပြန်သည်။
အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာနအနေဖြင့် နိုင်ငံတကာ Fundraiser များနှင့် ပူးပေါင်းလုပ်ဆောင်ခဲ့သည့် ရန်ပုံငွေရှာဖွေရေးစီမံချက်များမှ ရရှိလာသော ရန်ပုံငွေများကို တာဝန်ယူမှု၊ တာဝန်ခံမှုအပြည့်ဖြင့် စနစ်တကျစီမံခန့်ခွဲနေပြီး အလေအလွင့်မရှိ လက်ခံရရှိခဲ့သည်ဟု ဆိုသည်။
NUG ကာကွယ်ရေးဝန်ကြီးဌာနအနေဖြင့် နိုင်ငံတကာ Fundraiser များထံမှ တဆင့် Project DragonFly အတွက်အမေရိကန်ဒေါ်လာ (၂.၂) သန်းတိတိကို လက်ခံရရှိခဲ့သည်။
ရရှိထားသော ရန်ပုံငွေများကို လေကြောင်းရန်ကာကွယ်ရေးကဏ္ဍအတွက် အမေရိကန်ဒေါ်လာ (၁.၄) သန်းနှင့်တန်ပြန်လေကြောင်း တိုက်ခိုက်ရေးကဏ္ဍအတွက် အမေရိကန်ဒေါ်လာ (၈) သိန်း လျာထား သုံးစွဲလျက်ရှိသည်။
Project DragonFly မှ ရရှိခဲ့သော ရန်ပုံငွေများဖြင့် ပြုလုပ်ခဲ့သည့် စစ်ဆင်ရေးအောင်မြင်မှုများကို လုံခြုံရေး အရသင့်လျော်သည့် အချိန်များတွင် ထုတ်ပြန်သွားမည်ဟု အသိပေးထားသည်။
လုံခြုံရေးအရသင့်လျော်သည့်အချိန်များတွင်သာထုတ်ပြန်သွားမည်ဟု ဆိုထားသော်လည်း ယခုနှစ် ဖေဖော်ဝါရီ၃ရက်တွင် ရဟတ်ယာဉ်တစ်စီးကိုပစ်ချနိုင်ခဲ့ကြောင်း NUG ကာကွယ်ရေးဝန်ကြီးဌာနကထုတ်ပြန်သည်။
” ၂၀၂၃ ခုနှစ်၊ ဖေဖော်ဝါရီလ (၃)ရက်နေ့၊ နေ့လည် (၃:၄၅)နာရီခန့်က စစ်ကိုင်းတိုင်း၊ ဟုမ္မလင်းမြို့နယ်၊ရွှေပြည်အေးမြို့သစ်အနီးတွင် ဖြစ်ပွါးခဲ့သော တိုက်ပွဲအတွင်း အာဏာသိမ်းအကြမ်းဖက်စစ်တပ်၏ ရဟတ်ယာဉ်တစ်စီးကိုပြည်သူ့ကာကွယ်ရေးတပ်မတော်(PDF) ခန္တီးခရိုင်တပ်ရင်း (၁)- ဟုမ္မလင်း၊HPDF-124 ၊ HPDF၊HPDF မိုးကြိုး၊ပြည်သူ့ကာကွယ်ရေးအဖွဲ့များ(ပကဖ)နှင့်မဟာမိတ်တပ်ပေါင်းစုများမှ ပျက်ကျအောင် တိုက်ခိုက်နိုင်ခဲ့သည် “ဟု ထုတ်ပြန်ချက်၌ ဖော်ပြထားသည်။
အဆိုပါထုတ်ပြန်ချက်တွင် မည်သည့်ပရောဂျက်မှရရှိသောလက်နက်များဖြင့်ပစ်ခတ်သည်ဟု မပါရှိခဲ့သလို ထိုရဟတ်ယာဥ်ပစ်ခတ်မှုကို” မမများနဲ့ပွဲကမယ်“ပရောဂျက်မှရရှိသော လက်နက်ကြီးများဖြင့်ပစ်ခတ်ခြင်းဖြစ်သည်ဟု ပရောဂျက် တာဝန်ရှိသူတစ်ဦးကပြောသည်။
” စစ်ကိုင်းတိုင်းပရောဂျက်မှာ ထောက်ပံ့ထားတဲ့တပ်ရင်းတွေကနေတိုက်တာပေါ့နော်။ ဆိုတော့ တိုက်တဲ့ပစ္စည်းက” မမ “တွေနဲ့ပစ်လိုက်တာပေါ့နော် “ဟု မမများနဲ့ပွဲကမယ် ပရောဂျက်တာဝန်ရှိသူက သံလွင်ခက်ကိုပြောဆိုထားသည်။
ထိုဖြစ်စဥ်တွင် လေယာဥ်ပစ်ချနိုင်သည့်မှတ်တမ်းအထောက်အထားများကို တာဝန်ရှိသူများဘက်မှနောက်ဆက်တွဲဖော်ပြနိုင်ခြင်းမရှိခဲ့သည့်အပြင် တော်လှန်ရေးအင်အားစုများအနေဖြင့် တန်ပြန်လေကြောင်းတိုက်ခိုက်မှုများကို ထိရောက်စွာမပြုလုပ်နိုင်သဖြင့် စစ်ကောင်စီ၏ လေကြောင်းတိုက်ခိုက်မှုများကို နိုင်ငံအနှံ့၌ပိုမိုဆိုးရွားစွာခံနေကြရသည်။
လေကြောင်းရန်ကာကွယ်ရေးအတွက် ဒေါ်လာ၁.၄သန်းလျာထား၍လုပ်ဆောင်နေသည်ဟု NUG ကာကွယ်ရေးဝန်ကြီးဌာနက ထုတ်ပြန်ထားသော်လည်း ယခုနှစ်စပိုင်းမှစ၍ လေကြောင့်တိုက်ခိုက်မှုများကြောင့် ပြည်သူများထိခိုက်သေဆုံးမှု ဖြစ်စဥ်များပိုမိုဖြစ်ပွားနေသည်။
ပြီးခဲ့သော ၂၀၂၂ ခုနှစ်တွင်လေကြောင်းတိုက်ခိုက်မှုကြောင့် မိုးဗြဲစစ်ရှောင်များထိခိုက်သေဆုံးမှု ၊ ဒီပဲယင်းမြို့နယ်လက်ယက်ကုန်းတိုက်ခိုက်ခံရမှုနှင့် ကချင်ပြည်နယ် ၊ဖားကန်မြို့နယ် အနန့်ပါတိုက်ခိုက်ခံရမှုစသည့် ပြည်သူများအစုလိုက်သေဆုံးမှု ဖြစ်စဥ်များဖြစ်ပွားခဲ့သည်။
ယခုနှစ်အတွင်း၌ စစ်ကောင်စီတပ်၏လေကြောင်းတိုက်ခိုက်မှုကြောင့် စစ်ကိုင်းတိုင်း၊ကသာမြို့နယ် မိုးတားတိုက်နယ်၌ အလှူအတွက် ချက်ပြုတ်နေသော ပြည်သူ ၇ဦး၊ ကရင်ပြည်နယ် ဖာပွန်ခရိုင်းအတွင်း၌ ရွှေတူးဖော်ရေးလုပ်ငန်းမှ ပြည်သူ ၆ဦး၊ စာသင်ကျောင်းနှင့်ဘုရားကျောင်းများတိုက်ခိုက်ခံရမှု၌ ကလေးငယ်နှင့်ဓမ္မဆရာများအပါအဝင်ပြည်သူ ၅ ဦး၊ ကရင်နီပြည်ဘောလခဲမြို့နယ်၌ သစ်လုပ်ငန်းလုပ်နေသောပြည်သူ ၃ဦးတို့ အသက်ဆုံးရှုံးခဲ့သည်။
ထို့ပြင် ယခုနှစ်စပိုင်းမှစ၍ လေကြောင်းတိုက်ခိုက်ခံမှု အကြိမ် ၁၅၀ ကျော်အထိပြုလုပ်ခံနေရသည့် ချင်းပြည်နယ်တွင် CNF ဌာနချုပ်တိုက်ခိုက်ခံရမှု၌ CNAရဲဘော်၅ဦးနှင့် ယမန်နေ့၌ ထန်တလန်မြို့နယ် ခွာဖိုရွာလေကြောင်းတိုက်ခိုက်ခံရမှု၌ ကလေးငယ်များအပါအဝင် ပြည်သူ၈ဦးအသက်ဆုံးရှုံးခဲ့ရသည်။
ပုံစာ–ယမန်နေ့မတ်လ ၃၀ရက်တွင် ထန်တလန်မြို့နယ် ခွာဖိုရွာလေကြောင်းတိုက်ခိုက်ခံရမှုမှ ပျက်စီးမှုများနှင့်ထိခိုက်သေဆုံးမှုများ။
